Beste Winkelsmidt

 

Ek wil regtig voorstel dat jy in persoon met iemand gaan praat. Ek weet nie wat jou situasie is nie en miskien het jy al persoonlik met iemand gaan praat. Of miskien weet jy nie met wie om in jou omgewing te gaan praat nie. Daar is egter ‘n klomp faktore wat ‘n rol kan speel in die drome wat jy het en ‘n klomp dinge wat iemand daarom vir jou sou wou vra. Dit is daarom nogal moeilik om jou sommer so deur die epos te probeer help.

 

Ek sal jou graag wil probeer help om by die regte mense uit te kom. Maar eers wil ek weet of jy bereid sal wees om in persoon met iemand te gaan gesels. Ek dink die regte persoon om mee te gesels is iemand wat ‘n Christen is en wat ervaring in Christelike berading het. ‘n Goeie plek om na so iemand te begin soek, is natuurlik om by jou eie kerk te probeer uitvind of daar iemand is wat ervaring het in Christelike berading, of van so iemand weet.

 

Net een of twee opmerkings van my kant af oor drome in die algemeen. Drome is dikwels die manier waarop ons deur ons onderbewuste bewus raak dat daar spesifieke dinge in ons lewe is (waarvan ons nie duidelik bewus is nie) wat ons pla of bekommer. Ander kere is drome bloot maar net die onderbewuste se kreatiewe manier om onverwante dinge waaroor ons gedurende die dag of afgelope ruk gedink het, bymekaar te sit om sommer ‘n storie, ‘n verbeeldingsvlug, daarvan te maak.

 

Ek dink daarom nie dat daar noodwendig demone is wat jou probeer aanval nie. Tog sal ‘n mens wel die moontlikheid ondersoek dat jy wel in ‘n spesifieke geestelike stryd betrokke is. ‘n Goeie berader sal egter al hierdie en ander moontlikhede saam met jou kan ondersoek om agter te kom waar die probleem waarskynlik lê en wat daaraan gedoen kan word.

 

Terloops daar is baie Christene wat wonder of God nie soms self ook met ons in of deur spesifieke drome praat nie. My raad aan enigemand wat wil weet of God met hom/haar deur 'n spesifiek droom gepraat het, is om deur gebed en aan die hand van die waarheid in die Skrif, met God daaroor in gesprek te tree. Kan God met drome aan mense 'n boodskap oordra? Ja, ek dink Hy kan en Hy doen en daar is voorbeelde in die Bybel waar Hy dit ook gedoen het. Maar hier moet ons regtig onderskeiding aan die dag lê en nie meer van drome maak as wat daar rede is om te doen nie. Drome is 'n baie subjektiewe ervaring en om summier allerlei interpretasies aan sekere beelde te koppel lyk vir my na 'n baie simplistiese verstaan van die droom-ervaring.

 

Laat weet gerus wat jy dink oor my voorstel.

 

Groete

Udo