Personeel

personeel

Udo Karsten is sedert 1997 in voltydse hoedanigheid by Christelike bediening betrokke. Sy fokuspunte vir bediening het sedertdien onder meer die volgende ingesluit: Vriendskap-evangelisasie op kibboetse in Israel (CSV-diensjaar), straat-evangelisasie in Hillbrow (NGK Johannesburg), die ontwikkeling en aanbieding van kursusse oor dissipelskap (MES) en die fasilitering van kleingroepe onder hawelose mense in die middestad van Johannesburg. Hy was ook vir betrokke by Athletes in Action, die sportbediening van Campus Crusade for Christ, en spesifiek by studente van die Universiteit van Johannesburg met evangelisasie en dissipelskap. Udo is sedert 2005 voltyds betrokke by die ontwikkeling en werk van AntWoord, ‘n bediening vir Christelike Apologetiek. Udo is getroud met Ilse, ‘n opvoedkundige sielkundige werksaam by die Universiteit van Johannesburg. Kontak vir Udo

André van Zyl het van 1991 tot 1997 aan die RAU gestudeer en later sy doktorale studie aan die Universiteit van Johannesburg voltooi. Hy is sedert 1995 by ‘n verskeidenheid onderwys instellings werksaam (laerskool, hoërskool, tegniese kolleges, technikons en onderwys in Engeland). Hy is huidiglik verbonde aan die Universiteit van Johannesburg. Onderwys is André se hoof bedieningsfokus, maar hy was en is steeds by verskillende bedienings van die kerk ingeskakel. Hy was betrokke by ‘n diensjaar in die NG-gemeente Johannesburg en terwyl hy vir twee jaar in Engeland woonagtig was, was hy ook spesifiek verantwoordelik vir opleiding van selgroepleiers in die SA-gemeente Londen. Hier het André in 2001 betrokke geraak by ‘n bediening vir Apologetiek. Hierdie bediening het kampe gehou, selgroepe besoek en kursusse aangebied om gelowiges toe te rus en om terselfdertyd ook die evangelie te verduidelik. Die totstandkoming van die AntWoord bediening is die vrug van ‘n soortgelyke bediening wat reeds sedert 2002 informeel in Gauteng bestaan. André is getroud met Marianne wat met haar nagraadse studie in bio-ingenieurswese besig is aan die Universiteit van Pretoria. Kontak vir André

Johan Erasmus is oorspronklik van Newcastle waar hy aan die Hoërskool Ferrum gematrikuleer het. In 2005 het hy as eerstejaar ingeskryf by die NWU Potchefstroom en ‘n trotse inwoner van Veritas manskoshuis geword. Sedertdien het hy ‘n BA in Geesteswetenskappe en ‘n honneurs in filosofie by dieselfde instelling verwerf. Hy is tans besig met sy MA in teologie by die NWU Potchefstroom. In 2008 raak Johan betrokke by die AntWoord-bediening en is tans werksaam by ‘n kerkplanting inisiatief in Pretoria, genaamd Dialoog. Hier is hy verantwoordelik vir omsien na die jeug en vir onderrig in die Christelike apologetiek. Kontak vir Johan

Roedolf Botha is ‘n evangelis, kerkleier, kerkplanter en leraar wie se persoonlike lewensmissie dit is om die evangelisering van die wêreld te bevorder deur die kerk van Jesus Christus op te lei deur seminare, DVD materiaal, lering en kerkplanting. Hy glo die kerk moet ’n duidelike en intelligente stem kan bied in die kommunikasie van die evangelie van Jesus Christus op die markplein van die lewe. Roedolf het ‘n B.A, B.D. en ‘n Meesters graad verwerf aan die RAU, die Universiteit van Pretoria en UNISA onderskeidelik, en is tans besig met ‘n doktoraal in Nuwe Testament by die Universiteit van Nijmegen in Nederland onder Suid-Afrikaanse teoloog en skrywer Jan van der Watt. Nadat Roedolf leraar was by twee NG gemeentes vanaf 1993 to 2000, het hy ‘n onafhanklike missionêre plaaslike gemeente suksesvol geplant en laat groei vanaf vier individue in 2001 tot ’n gemeenskap van seshonderd in 2009. Hy het dit gedoen deur innoverende leierskap, praktiese Bybelse lering en passievolle evangelisasie. Roedolf is met Marié getroud en hulle het twee kinders, Ruben en Jessica. Kontak vir Roedolf. Sien ook: Dialoog

Lees meer (pdf) oor die lede van AntWoord (Kruispad-artikel).